براءه عمرو دياب من التهم

مساء الخير
انا عارف ان الموضوع يمكنيكون طويل شويه بس انا جبته لاهميته
الموضوع مش انا اليكتبه....انا لقيته مكتوب في الجروب بتاع
Amr Diab's Lover
الي على الفايس بوك
والصراحة الموضوع عجبنيجدا
والموضوع بيوضح ازاي ان الاغاني الي اتهم بيها الكينج مشحقيقة
و كمان....ولا قولوكم:
اسبكم تقروا الموضوع واتمنىانه يعجبكم...


والله والله وبقولها بحلف اهو
عمرو قانونيا مسرقش اغنيه واحده حتي الان

كل الشبه بين الاغاني اللي اتقال انه سرقها والاغاني الاجنبيه انها بتبقي فورمات موسيقيه متشابهه وده شيء بيحصل في كل الدنيا وعلي العموم الرد هيبقي وافي تماما لكل اللي جوه دماغكم وقريب شهر بالكتير اوي هينزل توبيك فيه عدد كبير جدا من الاغاني المسروقه من عمرو بشكل جديد وجميل هيعجبكم ويهنتشر علي النت بفضلكم ان شاء الله

علي العموم للاسف الناس بتظلم عمرو وبتتكلم عنه وبتقول عليه سارق مع انه الوحيد اللي مبيسرقش ومع انه الوحيد اللي بيتسرق منه ومع ان الكل بيسرق وهو لا

هقولكم حاجه
اغنيه بقت عاده لحماقي واغنيه دايما واحشني هواك لاحمد فهمي واغنيه تسلملي عينيك
اسمعوا التلاته ورا بعض
هتلاقوا التوزيع متشابه تماما في الاغاني دي

بس دي مش سرقه
ده فورم اسمه الريجاتون
طب ليه محدش قال ان احمد فهمي وان محمد نور سرقوا من حماقي ؟
نفسي اعرف

اغنيه كده رضا لهشام عباس
واغنيه وانت معايا لحسام حبيب
واغنيه خدتني لسامو زين

التوزيع في ال 3 اغاني واحد هو هو بالظبط
محدش قال سرقه
وهي مش سرقه
ده فورم موسيقي واحد

حاجه كمان
دخله اغنيه عينيا بتحبك هي هي دخله اغنيه يا ريت لحماقي
اسمعوها كده وهتعرفوا قصدي

ومع ذلك مش سرقه لان الشبه في ثانتين تلاته فقط لا غير

لكن مع عمرو بيحاولوا يقنعوا الناس ان دي سرقه فعلا

علي العموم ده رد واحد ديابي جميل اسمه احمد المصري بخصوص موضوع سرقه الاغاني اسيبكم مع كلامه

هابتدى اولا باغنية "خلصت فيك كل الكلام"..الى بيقولوا انها مسروقة من يا رايح لرشيد طه..

اوكى..

الى بيفهم في المزيكا او حتى الى مش بيفهم ويسمع الاغنيتين مش هايلاقى اى شبه يذكى بين لحن خلصت ويارايح!!

امال الناس بتقول عليها مسروقة ليه؟

ابتدى اسمع الاغنية من اول الثانية 14 "00:14" على الوينمب هاتسمع فاصل صغير عمله الموزع "حميد الشاعرى" هوا دا الشبه الوحيد الى بين يا خلصت

ورايح؟!!

لانه ببساطة لما تجى تسمع بقية الاغنية هاتلاقى ان اللحن في طريق تانى خالص عن يا رايح..

وتحديدا من اول كوبلية قلبك ندانى رجعنى تانى خدنى حنانك لهواها..ولحد اخر الاغنية..

هوا دا بس الشبه الوحيد بين الاتنين ..والفاصل دا بياخد ثانية او ثانيتين بكبيره..يبقى منفتيش ونقول مسروقة..

لان معروف ان الملحن "يستطيع ان يقتبس من اى لحن اخر بدايته فقط ويكمل هوا عليها ..سمعت انها 8 ثوانى او مازورة كاملة او حاجة زى كده"

وفي حاجة اهم من كل الليلة دى..

من الناس الى هاتيجى تشكك برضه وتقول لا مسروقة..الانترو او المقدمة دى من التراث الجزائرى..طيب هوا من امتى الاخد من التراث بقى سرقة!

حتى لو متكتبش تراث مش لازم لان الملحن الى بيلحن الاغنية بيدور في تراثات البلاد وبيطلع فكرة او تيمة ويكمل عليها ..يبقى كده هوا الى تعب وشال الاغنية بلحنها

وابسط حقوقه نحط اسمه عليها!...
ندخل في اغنيه تملي معاك اللي بيقولوا انها مسروقه من مارك انتوني

الناس بتقول الاغنية دى مسروقة وبتاع وكأن "الجيتار الاسبانش" بقى ملكية خاصةلمارك انتونى واى حد تانى يستخدمة يبقى سارقه!

الشبه بين عندما احلم وتملى معاك ان دى بجتيار سبانش ودى بجيتار سبناش!!!

وتوزيعة الاغنية في الخلفية قائمة على الجيتار الاسبانى مع البيتس ..ودى مخترعاهش مارك انتونى دا نوع موسيقى توزيعى كان منتشر ومازال منتشر لحد دلوقتى..

والجيتار الاسبانى بقى الاله المفضلة لكل الملحنين العرب بدون استثناء..

حتى رحيم صاحب مدرسة الشجن استخمده في اول اغنية لحنها لدياب الى هيا وغلاوتك..على الرغم ان مش دى سكة رحيم خالص..

المهم ان هوا دا السبب الى خلت الناس تقول علي الاغنيتين كده..ان الجيتار مستخدم بكترة في الاغنيتين او بشئ من الدقة الاغنية قائمة على الجيتار فقط..

وفي حاجة مهمة ان شريف تاج ملحن الاغنية طلع في الFM وقال ان الاغنية دى حقوق توزيعها ونشرها بلغات اخرى في العالم اشترتها منه شركات نشر موسيقى عالمية

وكله بالاوراق والاثباتات ودا الى حصل فعلا ان تملى معاك اتعملت ببتاع 7 لغات زى ما احمد نيفين حط النسخة الهندية ليها هنا وهاتلاحظ ان المطرب الهندى بيغني تملى معاك

بكلماتها المصرية بعد ما يقولها بالهندى..

وطبعا بالمنطق والعقل الشركات العالمية دى مش هاتيجى تعمل كده مع شريف تاج الا لو كانوا متاكدين ان دى اغنية ومارك انتونى اغنية تانية..

لانك كمان ببساطة لما تيجى تدندن اللحن هاتلاقى اختلاف شنيع بين الاتنين..

ندخل في اغنية تانية وهى اغنية يا حبيبى لا..

المقدمة التوزيعية للاغنية قيل انها شبه 7Days لكريج ديفيد..

يعنى كل واحد في ودن بتسمع..

بص لعب الجيتار الاسبانى في حبيبى لا عامل ازاى وعامل ازاى في السيفين ديز لكريج ديفيد...

اولا مستحيل يكون لعب الاتنين بنفس الطريقة تبيكل واى حد بيلعب جيتار هايعرف كده بسهولة..

لان في لعب وبعدين ستوب وبعدين تكملة في حبيبى لا بشكل بيطلع مزيكا مختلفة عن اغنية كريج..

الشبه الوحيد..

هيا برضه نفس حدوتة تملى معاك ان دا صولو جيتار طبيعى انه يطلع تون بالشكل ده ..

ودا كلام اشرف عبد المنعم في برنامج على قناة النيل للمنوعات من فترة وكان فيه خالد حماد وهانى شنودة واشرف وواحد اخير معرفش مين..

المهم سمعوا اشرف الاتنين..

اشرف قالها بالحرف مفيش اى شبه بين الاتنين الا ان الاتنين صولو جيتار سبانش وبرضه الجيتار الاسبانش مش حكر على كريج ديفيد او ورث عن بابا هوا يعنى؟!

وهيا دى الحقيقة من غير ما اشرف يقول الاتنين مطلعين مزيكا مختلفة بس الالة واحده وبالتالى لازم تسمع اوتار الجيتار في الاتنين !
ندخل بقى في الاغنية الى هيا لبانه اى حد عايز يتهم عمرو دياب بالسرقة..

وهي اغنية قلبى اختارك الى بيقولوا انها مسروقة من اغنية so smoth لكارلوس سانتانا و مارك انتونى.

طيب ....

نسمع كده قلبى اختارك بداية من الدقيقة 00:17 لحد الدقيقة 00:22 ..

الجزئية دى تحديدا هيا الى قايم عليها شكل الاغنية نفسه..

الى هوا الاليكتريك جيتار..

ودى..

مقطوعة وجزئية توزيعية واحده في اغنية قلبى اختارك لعمرو دياب واغنية so smoth لكارلوس سانتانا..

طيب منا كده بقول انها مسروقة..

هاعيد الكلام الى قولته فوق..

في مواضيع الحماية وحقوق الملكية في اتفاق على ان الملحن يستطيع اقتباس جزء معين من لحن اى اغنية تانية ويكمل عليه بدون الاشارة من قريب او بعيد لصاحب الجزئية

المقتبسة دى..

ودى حاجة متفق عليها في العالم كله..

يعنى لو طبقنا الكلام على الاغنية دى..

هانلاقى ان التشابه بين الاتنين في الجزئية من بداية الثانية 17 في اغنية دياب لحد الثانية 22 .. وزى ماقلنا الى هيا جزئية الاللكيتريك جيتار..

الواحده في الاتنين..

وهوا دا الى خلى الناس تقول كده عن الاغنية ..والمفروض كده زى ماقلنا حسب الكلام بتاع حقوق الملكية ان ملحن قلبى اختارك مش سارق ولا بتاع..

دا مقتبس الجزء القانونى ومكمل على بقية الاغنية وعلى بقية اللحن والى بتحس بالفرق فعلا بين اللحنين في تكلمة الاغنية..

وفي حاجة مهمة جدا انا حاططها في الفايل ده..

دلوقتى الجزئية بتاعت الاليكتريك جيتار وراها خلفية توزيعية طبعا ..

الى اكتشفته ان التوزيعة الى ورا في الخلفية في اغنية قلبى اختارك مختلفة عن التوزيعة في الاغنية الاجنبى!..

بس الاداة واحده الى هيا الساكسغون..

وانا في الفايل ده وطيت صوت الاليكتريك جيتار عشان تقدروا تعرفوا الفرق بين توزيعة الخلفية في الاغنية دى والاغنية دى..

وخلى بالكوا انا لسه في ثوانى عزفة الاليكتريك جيتار ومخرجتش منها !

و الشبه زى ماقلنا في عزفة الاليتريك جيتار الى مش بتاخد غير ثوانى بسيطة وبعد كده اللحن في قلبى اختارك بياخد سكة تانية..

ودا الى هاتلاقيه في الفايل ده..وتكملة الاغنية بقى في كوبليهات انت الى لقيت معاك ..ويابرئ زى الملاك

يعنى الخلاصة ان كل الليلة دى على معزوفة الاليتكريك جيتار الى بتاخد ثوانى والى واحده فعلا في الاتنين..

في حين ان توزيعة الاغنية في الخلفية مختلفة وان كانت باداة واحده ودا مش سرقة لان زى ماقلنا للمرة التاسعة الاداوات مش حكر على بنى ادمين!.
واللحن كمان مختلفة اصلا..بس هيا المقدمة التوزيعية بواسطة طارق مدكور..

طيب ندخل على اغنية اكتر واحد بيحبك الى بيقولوا انها مسروقة من اغنية bailamous او بيلامور مش فاكر بصراحة..

المهم انها بتاعت انريكى اجلاسيوس..

للاسف ملقتش اغنية بيلاموس عندى عشان اقدر احط فايل تحملوه عشان تعرفوا الفرق..

الفرق للمرة العشرين هوا نفس الاله المستخدمة..في الاغنيتين

وهوا الاسبانش جيتار..

بس هنا في فرق ان في تشابه الى حد ما في الانترو بين الاغنيتين..

بس التشابة ده بيبتدى فين بالظبط؟

من الثانية 11 ويخلص في الثانية 17

الى هوا صولو الجيتار الاسبانى ..وبعد كده اللحن رايح في مشوار تانى مختلف عن بيلاموس الى "بحبك موت ليورى مرقدى " الى شبهها فعلا بشكل كبير..

مش اكتر واحد بيحبك!

يعنى الموضوع تشابه صولو جيتار..واله واحده مستخدمة في مساحة مابتعديش ال6 ثوانى! طب معقول يعنى نعتبر ان اكتر واحد بيحبك مسروقة من بيلاموس!!!

مش منطق يعنى..

طيب ندخل على هيافه اخرى..

وهيا اغنية ملهاش حل تانى..

دى بقى قمة الهيافة والغلاسة لما نقول انها مسروقة من اغنية we will rock u!!!!

وحط علامات تعجب للصبح..مش مشعقول يعنى تبقى الالات الموسيقية حكر على الاجانب وكوخا في ايد العرب الى عملوا المزيكا اصلا..

ناهيك عن ان المقدمة نفسها مختلفة بشكل شنيع في الاغنيتين

لا والى يضحك ان اغنية عمرو دياب اصلا الدف او الطبلة فيها بيبقى..

ضربة في الاول وبعدين ضربتين..في اغنية روك يو ضربتان في الاول وبعدين ضربة اخيرة على الدف..

ودى الوتيرة الى ماشية عليها الاغنية او التوزيعة بتاعتها على طولها..

لكن مع اختلاف ملهاش حل تانى خالص ..دى كانت مقدمة بدف برئية اى بنى ادم ممكن يعملها بايده على التربيزة!

والاغنية اصلا ليها لحن وتوزيع مختلف تماما بعد كده..!!
اغنية العيون بقى انا بعتبر الى بيقارن بينها وبين الاغنية الاجنبية الى معرفهاش ولا مسمعتهاش قبل كده بصراحة..

والى عارف انهم هايكونوا بيقارنوا في المقدمة..

طيب انا عايز الناس تسمع اغنية العيون بس..

وتسمع كم الاغانى الى مقدمتها مقدمة اسبانى خالصة مخلصة بالاسبانش جيتار بالاضافة الى الهارمونيكا " لو كان اسمها كده صح" الى هيا عبارة عن علب بيضرب

عليها زى مابتعمل نسمة عبد العزيز كده في فرقة عمر خيرت..هيا دى الالة الى اقصدها..

وكم الاغانى دا ظهر قبل العيون وبعد العيون ومازال مستخدم حتى الان بكثرة...

لانها ببساطة اصبحت موضة مزيكا وشئ مسلم بيه وناس كتير بتعمله ومازالت بتعمله..

عمله عمرو دياب ايام العيون وبشكل تانى في قلت ايه او قبل الوداع في البوم اكتر واحد..

وعامله محمد فؤاد في اغنية صلصا..و المزيكا دى او النوع ده ظهر في اساسى لاتينى واسبانى ظهر في اسبانيا وامريكا الجنوبية..

او بمعنى ادق هما الى اخترعوه..

وموضة المزيكا زى موضة اللبس متاحة للجميع تاخد منها زى ماهيا عايزة..

ومش معقول هانكتب فلكلور اسبانى!..

يعنى انت لما تنزل تشترى بنطلون نازل موضة هل بيبقى مكتوب عليه موضة اسبانى مثلا او موضة كذا!..

انت عارف انه موضة من بلد كذا لكن انت لابسه وبقى بتاعك بعد ماشتريته مش بتاع البلد الى جاى منها!ّ..

هوا هوا الحال في المزيكا الموضوع موضة بتنتشر والناس بتاخدها وكل واحد بقى بيستخدمها زى ماهوا عايز..

عمرو دياب عجبه النوع ده لما عمل العيون سنة 96 او اقل مش فاكر بصراحة وخدها مقدمة لاغنيته العيون والملحن كمل اللحن وعمل حاجة مختلفة وجديدة على ايام

ماظهرت..وادى الليلة كلها .

ندخل في اخر حاجة بقى اغنية " صدقنى خلاص " الى بيقولوا انها مسروقة من اغنية مش عارف اسمها ايه لويست لايف..

طيب..

ماتيجوا نسمع الاتنين كده..

الالة المستخدمة هنا هيا البيانو مع خلفية وتريات في مقدمة الاغنية..

بصراحة انا مش شايف اى تشابه عشان اتكلم في الاغنية دى..

بس انا بكمل اغنية عمرو للاخر..

وشايف لحن مالوش اى علاقة بلحن ويست لايف..

دى تيمة ودى تيمة مختلفة تانية..

وفي الفايل ده بقارن بين الاتنين في مقاطع كتير..وانا عن نفسى سامع حاجة في اغنية عمرو وسامع حاجة تانية في اغنية ويست لايف..

حتى في الحتة الى بيقول فيها عمرو قرب ليا شوية شوية ..ومايقابلها في الكوبلية الاجنبي سامع لحنين مختلفين تماما..

وفي المقدمة مش شايف اى تشابه غير ان هنا في وتريات وهنا في وتريات وهانقولها تانى الالات الموسيقية مش حكر على بنى ادمين!

بس احقاقا للحق في تشابه صغير اوى في مقدمة اغنية عمرو مع حتة هما بيقولها ..ودى موجوده في اخر الفايل بس دا تشابه صغير جدا عمل ثانيتين بالعدد!

متهئيلى انا كده غطت الاغانى الى بيتهموا فيها دياب انه سارقها..

عايز بس اقول حاجة..

عمرو دياب اكيد مبيسمعش مزيكا اجنبى كتير ويمكن قليل اوى..

لانه بيحب مزيكته واكيد المزيكا العربية لانها فعلا حلوة اوى..

مش بس مزيكا مصر..لا مزيكا كل البلاد وخصوصا المغرب العربى والراى والايقاعات المغربية الى عمرو بدا يكتر منها خصوصا في الاغانى الى من تلحين محمد رحيم

وبيسمع تيمة لحن من ملحن وبيسمع التوزيعه النهائى مش بيشغل باله هيا جيه ازاى او منين المهم هوا هايغنيها ازاى..

وادينا بنسمع الحان دياب وبنلاقيها الحان شرقية جميلة لا متاخده من حتة ولا بتاع..

يعنى خواطر عمرو دياب الى بيترجمها الى الحان بتكون نضيفة وراقية...

عموما انا بتكلم في 5 اغانى فيهم تشابهات وضحتها..

مش زى المتخلفين الى كتبوا في جريدة الجمهورية ان 90% من اغانى دياب مسروقة..

عمرو دياب عمل تقريبا بتاع 200 وحاجة اغنية..

هل 5 اغانى من 200 اغنية يعموا نسبة 90%!!!!..

وقريت الخبر لقيتهم كاتبين في سايت كذا " الى هوا السايت الى حاطط الاغانى وبيقول عليها مسروقة دى" يعنى هوا دا مصدرهم من غير مايدرسوا الاغانى ولا بتاع

شافوا السايت ده بالاغانى دى مع كره شخصى لعمرو دياب وحط علطول ولا دراسة بقى ولا بتاع ..

في حين انهم حتى ماذكروش كم الاغانى المقتبس برضه والى في تشابهات كتير مع اغانى عمرو دياب..

ودى هاتلاقيها كلها بالكامل في العنوان ده..

http://www.amrdiab.ca/songs.html

هاتلاقى هندى ويابانى واسرائيليى وكمية اغانى كتير متاخده ومقتبسة من اغانى عمرو دياب..

بس احنا فالحين نهلل ونكبر ورا اى حد يقولك المطرب العربى ده في حتة شبه حتة في اغنية كذا..

ولما مطرب اجنبى ياخد اغانى كاملة لينا سواء لعمرو دياب او عبد الحليم او ام كلثوم..

يبقوا الناس دى استاذة وعبقرية ومنقدرش نقولهم 3 التلاتة كام..لمجرد انهم اجانب..

بشكل فعلا بيدل على تخلفنا ونومنا في العسل وعدم تفريقنا لاى حاجة بنمشى ورا الموجة وخلاص..

يعنى لو طلع حد بعد يومين قالك وحشتينى دى مسروقة بالكامل من اغنية الكيم كيم كا..

هاتطلع ناس تهلل وتطالب باعدام عمرو دياب رميا بالقباقيب عشان خد اغنية عظيمة من تراثنا وهرم رابع الى هيا اغنية الكيم كيم كا واه يا قفا!

عايزين بقى نشيل الاهواء الشخصية ونقول لواحد لما يبدع برافو عليك ايا كان اسمه بقى..

عمرو دياب ولا محمد فؤاد ولا منير ولا اى حد بيقدم ابداع حقيقى..

حاجة اخيرة انا مش خريج الكونسرفتوار انا بس واحد بيسمع عمرو دياب وبيسمع اجنبى كمان من زمان جدا..

وحسيت بالفرق وبكل الكلام الى متكوب فوق ده..وحبيت اقوله!

والكلام ده بالفايلات مش بس حكر لمنتدى عمرو في ايجى دا لكل منتدى لدياب ..والموضوع برضه لا يذيد عن كونه رؤية شخصية ديابيه جدا.